Սրտաբանների Եվրասիական ասոցիացիայի IV վեհաժողովը

Հոկտեմբերի 10-ին և 11-ին Երևանում կայացավ Սրտաբանների Եվրասիական ասոցիացիայի IV վեհաժողովը: Հայկական բժշկական ասոցիացիայի նախագահ, Սրտաբանների եվրասիական ասոցիացիայի խորհրդի անդամ, Երևանի գլխավոր սրտաբան Պարունակ Զեյվեյանը լրագրողների հետ հանդիպմանը ներկայացրեց, որ վեհաժողովի ընթացքում քննարկվեցին սիրտանոթային համակարգի հիվանդությունների ախտորոշման, վարման և բուժման արդի խնդիրները:

«Սրտաբանների եվրասիական ասոցիացիայի գործադիր մարմնի որոշումը՝ անցկացնել վեհաժողովը Երևանում պատվաբեր է Հայաստանի սրտաբանների և բժշկության հանրության համար: Ունենալով կայացած և զարգացած սրտաբանական ծառայություն Հայաստանի սրտաբանությունն իր ուրույն տեղն ունի տարածաշրջանային բժշկագիտության ոլորտում, ինչի ապացույցն է «Սրտաբանների Եվրասիական ասոցիացիայի IV վեհաժողով»-ի անց կացումը Երևանում»,- կարևորեց Պ. Զեյվեյանը:

Զրուցակցի փոխանցմամբ. «Միջոցառմանը ներկա էին պաշտոնատար անձիք Ռուսաստանից, Ղազախստանից, Բելառուսից և այլն երկրներից, ինչպես նաև Հայաստանի սրտաբանական ծառայության ականավոր ներկայացուցիչներ: Դասախոսություններով հանդես կգան նաև արտերկրից ժամանած հայտնի ու ականավոր սրտաբաններ»:

Պ. Զեյվեյանն ափսոսանքով նշեց, որ, ցավոք, առողջական խնդիրների պատճառներով վեհաժողովին չի մասնակցել Սրտաբանների եվրասիական ասոցիացիայի պատվավոր նախագահը, ով ուղերձ է հղել: «Եվգենի Չազովը հայ ժողովրդի լավագույն բարեկամներից է: Սպիտակի երկրաշարժի առաջին օրվանից նեցուկ է եղել մեզ»: 

Զրուցակիցը հույս հայտնեց, որ մասնակցությունը վեհաժողովի աշխատանքներին օգտակար կլիներ հանրապետության բոլոր սրտաբանների, սրտաբանությամբ զբաղվող ֆունկցիոնալ և ժամանակակից այլ մեթոդներով ախտորոշողների, թերապևտների, ընտանեկան բժիշկների և տվյալ բնագավառում աշխատող այլ մասնագետների համար:

Վեհաժողովի համանախագահ, Հայաստանի սրտաբանների ասոցիացիայի նախագահ, ՀՀ ԳԱԱ ակադեմիկոս Կառլեն Ադամյանը կարևորում է վեհաժողով անցկացնելու գաղափարը: Իր իսկ խոսքով՝ Խորհրդային միության տարիներին սրտաբանները հաճախ են հանդիպել այս կամ այն տարեկան վեհաժողովներին՝ քննարկել նորություններն ու ձեռքբերումները:

Կ. Ադամյանը նշեց, որ ապացուցողական սրտաբանության ոլորտում հետազոտությունների մեծ աճ կա. ամեն տարի փոփոխվում են ուղեցույցները, քանի որ նոր տվյալներ են ի հայտ գալիս. «Հայաստանը բոլոր անդամ երկրներից տարբերվում է. մենք լույս ընծայեցինք հինգ հատորից բաղկացած ապացուցողական սրտաբանության մասին մատենաշար, որն ընդգրկում է վերջին տարիներին ապացուցողական սրտաբանության ոլորտի բոլոր նորությունները: Այն, ի դեպ, անվճար տրվել է առաջին օղակի բժիշկներին: Հույս ունենք, որ այս վեհաժողովի ընթացքում քննարկվող որոշ թեմաներ կլինեն հրապարակման ենթակա»:

Սրտաբանների եվրասիական ասոցիացիայի խորհրդի գլխավոր քարտուղար Սերգեյ Նակոնեչնիկովը մեզ հետ զրույցում ասաց. «Մեզ համար շատ կարևոր է գիտելիքների գաղափարախոսությունը: Փորձում ենք այնպես անել, որ աշխարհի տարբեր ծայրամասերում ապրող բժիշկները հնարավորություն ունենան փոխանակել իրենց մասնագիտական փորձը: Սա է մեր վեհաժողովի գխավոր խնդիրը»:

Ս. Նակոնեչնիկովը նաև ասաց, որ վեհաժողովի ընթացքում կքննարկվեն ամենատարբեր հարցեր՝ սկսած ախտորոշումից մինչև սիրտանոթային համակարգի հիվանդություններ և դեղորայքային թերապիա... «Մեզ համար նաև շատ կարևոր է Հայաստանի, Բելառուսի, Ղազախստանի, Ռուսաստանի առաջատար վիրաբույժների մասնագիտական փորձի փոխանակումը, ինչպես նաև սրտանոթային համակարգի հիվանդությունների կանխարգելման նոր ռազմավարությունը»:

Հարցեր, պատասխաններ, մեկնաբանություններ